കളിക്കളത്തിലെ വീരനായകൻ മടങ്ങുന്നു; പ്രശസ്ത ഫുട്ബോൾ താരം അസീം കൊറളിയാടന്റെ മൃതദേഹം ഇന്ന് അരീക്കോട്ടെത്തും..

 

*വാഹനാപകടത്തിൽ മരണപ്പെട്ട പ്രശസ്ത ഫുട്ബോൾ താരം അസീം കൊറളിയാടന്റെ ഭൗതികദേഹം ഇന്ന് ഉച്ചയ്ക്ക് ശേഷം നാട്ടിലെത്തും. കോയമ്പത്തൂരിൽ വെച്ചുണ്ടായ ദാരുണമായ വാഹനാപകടത്തിലാണ് ദേശീയ തലത്തിൽ ശ്രദ്ധേയനായ ഈ ഫുട്ബോൾ പ്രതിഭ മരണപ്പെട്ടത്.*

*കോയമ്പത്തൂർ വിമാനത്താവളത്തിൽ കസ്റ്റംസ് ഇൻസ്‌പെക്ടറായി സേവനമനുഷ്ഠിച്ചു വരികയായിരുന്നു അദ്ദേഹം.*

*കട്ടാട്ടെ സൈനുട്ടിയുടെയും കൊറളിയാടൻ മുസാൻകുട്ടിയുടെയും മകനാണ് അസീം. പ്രശസ്ത ഫുട്ബോൾ താരവും പരിശീലകനുമായ അനീസ് കൊറളിയാടൻ അദ്ദേഹത്തിന്റെ ഇരട്ട സഹോദരനാണ്.* 

*കോയമ്പത്തൂരിലെ പോസ്റ്റ്‌മോർട്ടം നടപടികൾക്ക് ശേഷം മൃതദേഹം ആദ്യം കസ്റ്റംസ് ഓഫീസിൽ പൊതുദർശനത്തിന് വെക്കും. തുടർന്ന് വൈകുന്നേരം മൂന്ന് മണിയോടെ അരീക്കോട്ടേക്ക് കൊണ്ടുവരും.*

*പുത്തലത്തെ വസതിയിൽ ബന്ധുക്കൾക്കും സുഹൃത്തുക്കൾക്കും അന്ത്യാഞ്ജലി അർപ്പിക്കാൻ സൗകര്യമൊരുക്കും. തുടർന്ന് മഗ്‌രിബ് നമസ്കാരത്തിന് മുൻപായി ഖബറടക്കം നടക്കും.*

*കേരളത്തിന് പുറമെ ഇന്ത്യയിലെ വിവിധ സംസ്ഥാനങ്ങൾക്ക് വേണ്ടി ബൂട്ടണിഞ്ഞ കളിക്കാരനാണ് അസീം. അണ്ടർ 21 കേരള ടീമിൽ അംഗമായിരുന്ന അദ്ദേഹം സന്തോഷ് ട്രോഫിയിൽ 2010-ൽ മഹാരാഷ്ട്രയ്ക്കായും 2013-ൽ തമിഴ്‌നാടിനായും കളത്തിലിറങ്ങി മികവ് തെളിയിച്ചു.* 

*ഒൻപത് സീസണുകളിലായി ഐ-ലീഗിലെ മുൻനിര ക്ലബ്ബുകൾക്ക് വേണ്ടി പന്തുതട്ടിയ അദ്ദേഹത്തിന്റെ കരിയർ കായികപ്രേമികൾക്ക് എന്നും ആവേശമാണ്.* 

*2005-06ൽ വാസ്‌കോ ഗോവയിലൂടെ ക്ലബ്ബ് ഫുട്ബോളിൽ അരങ്ങേറ്റം കുറിച്ച അസീം, പിന്നീട് സാൽഗോക്കർ ഗോവ, മുംബൈ എഫ്‌സി, മഹീന്ദ്ര യുണൈറ്റഡ്, ഈസ്റ്റ് ബംഗാൾ എന്നീ പ്രമുഖ ടീമുകൾക്ക് വേണ്ടിയും കളിച്ചു.*

*ഫെഡറേഷൻ കപ്പ്, ഡ്യൂറന്റ് കപ്പ്, ഐഎഫ്എ ഷീൽഡ് തുടങ്ങിയ വലിയ ടൂർണമെന്റുകളിലും തന്റെ സാന്നിധ്യം അറിയിക്കാൻ അദ്ദേഹത്തിന് കഴിഞ്ഞിട്ടുണ്ട്.* 

*കളിക്കളത്തിലെ അസീമിന്റെ ഈ തിളക്കമാർന്ന അധ്യായം മായിച്ചുകളയാനാവാത്തതാണ്.*