ഓട്ടോ-ടാക്സി ചാർജ് വർദ്ധിപ്പിക്കണം: സി.ഐ.ടി.യു വാഹന ജാഥയ്ക്ക് അരീക്കോട് ഊഷ്മള സ്വീകരണം

*​അരീക്കോട്:* ഇന്ധന വിലവർദ്ധനവ് പിൻവലിക്കുക, ഓട്ടോ-ടാക്സി ചാർജ് വർദ്ധിപ്പിക്കുക, കള്ള ടാക്സികൾക്കെതിരെ ശക്തമായ നടപടി സ്വീകരിക്കുക എന്നീ ആവശ്യങ്ങൾ ഉന്നയിച്ച് സി.ഐ.ടി.യു നേതൃത്വത്തിൽ സംഘടിപ്പിക്കുന്ന സെക്രട്ടേറിയറ്റ് മാർച്ചിന്റെ പ്രചരണാർത്ഥം നടത്തുന്ന വാഹന ജാഥയ്ക്ക് അരീക്കോട് ടൗണിൽ ആവേശോജ്ജ്വല സ്വീകരണം നൽകി. വരുന്ന ജൂലൈ 24-നാണ് ആവശ്യങ്ങളുന്നയിച്ച് സെക്രട്ടേറിയറ്റ് മാർച്ച് സംഘടിപ്പിക്കുന്നത്.

​സി.കെ അഷ്റഫിന്റെ അധ്യക്ഷതയിൽ ചേർന്ന സ്വീകരണ യോഗത്തിൽ കബീർ ചേലക്കോട് സ്വാഗതം ആശംസിച്ചു. ജാഥാ ക്യാപ്റ്റൻ അറമുഖൻ, വൈസ് ക്യാപ്റ്റൻ ഫൈസൽ കെ.പി, ജാഥാ മാനേജർ ജലീൽ എം.എ എന്നിവർക്ക് വിവിധ വർഗ്ഗ ബഹുജന സംഘടനകളുടെ നേതാക്കൾ ഹാരമണിയിച്ച് സ്വീകരണം നൽകി.

​യോഗത്തിൽ അഡ്വ. കീഴിശേരി പ്രഭാകരൻ, യൂണിയൻ ജില്ലാ കമ്മിറ്റി അംഗവും സി.ഐ.ടി.യു ഏരിയ സെക്രട്ടറിയുമായ എം.ടി മുസ്തഫ, ഗോവിന്ദൻ കെ, ഭാസ്കരൻ, പ്രദീപ് കൂനൂർ, ഷിബു ചെമ്പ്രക്കാട്ടൂർ എന്നിവർ സംസാരിച്ചു. ശശി കിഴിശ്ശേരി ചടങ്ങിൽ നന്ദി രേഖപ്പെടുത്തി.

​മേഖലയിലെ നിരവധി ഓട്ടോ-ടാക്സി തൊഴിലാളികളും പൊതുജനങ്ങളും സ്വീകരണ യോഗത്തിൽ പങ്കെടുത്തു.