സ്വകാര്യ വാട്‌സ്ആപ്പ് ചാറ്റുകൾ മെറ്റ കാണുന്നു, വായിക്കുന്നു, നഷ്ടപരിഹാരം വേണം’; കോടതിയെ സമീപിച്ച് ഉപയോക്താക്കൾ

വാട്ട്‌സ്ആപ്പിന്റെ എൻഡ്-ടു-എൻഡ് എൻക്രിപ്ഷൻ സവിശേഷത ഉണ്ടായിരുന്നിട്ടും മാതൃ കമ്പനിയായ മെറ്റയ്ക്ക് സ്വകാര്യ സന്ദേശങ്ങൾ ആക്‌സസ് ചെയ്യാൻ കഴിയുമെന്ന് ആരോപിച്ച് അന്താരാഷ്ട്ര വാട്ട്‌സ്ആപ്പ് ഉപയോക്താക്കളുടെ ഒരു കൂട്ടം യുഎസ് കോടതിയിൽ കേസ് ഫയൽ ചെയ്തു. സാൻ ഫ്രാൻസിസ്കോ കോടതിയിൽ ഫയൽ ചെയ്ത കേസിൽ, വാദികൾ ഈ സവിശേഷതയെ “കപടം” എന്ന് വിളിക്കുകയും ടെക് ഭീമനിൽ നിന്ന് നഷ്ടപരിഹാരം തേടുകയും ചെയ്തു.ആസ്‌ട്രേലിയ, ദക്ഷിണാഫ്രിക്ക, മെക്സിക്കോ എന്നിവിടങ്ങളിൽ നിന്നുള്ളവരാണ് പരാതിക്കാർ. ജനുവരി 23നാണ് ഈ കേസ് ഫയൽ ചെയ്തത്. വാട്സ്ആപ്പിന്റേത് തട്ടിപ്പാണെന്നും നഷ്ടപരിഹാരം വേണമെന്നും പരാതിക്കാര്‍ ആവശ്യപ്പെടുന്നു. അതേസമയം ആരോപണങ്ങൾ തെറ്റാണെന്നും അസംബന്ധമാണെന്നും മെറ്റ വ്യക്തമാക്കി.

വാട്സാപ്പിന്റെ എൻഡ്-ടു-എൻഡ് എൻക്രിപ്ഷൻ (end-to-end encryption) രൂപകൽപ്പന ചെയ്തിരിക്കുന്നത് സന്ദേശങ്ങൾ അയക്കുന്നയാൾക്കും സ്വീകരിക്കുന്നയാൾക്കും മാത്രം വായിക്കാൻ കഴിയുന്ന രീതിയിലാണ്. ഇതിന്റെ എൻക്രിപ്ഷൻ കീകൾ (encryption keys) ഉപയോക്താക്കളുടെ ഉപകരണങ്ങളിൽ തന്നെ സൂക്ഷിക്കപ്പെടുന്നതിനാൽ മെറ്റയ്ക്ക് (Meta) പോലും ഈ സന്ദേശങ്ങൾ ഡീക്രിപ്റ്റ് ചെയ്യാനോ വായിക്കാനോ കഴിയില്ലെന്നാണ് കമ്പനി അവകാശപ്പെടുന്നത്.

എന്നാല്‍ ഡിലീറ്റ് ചെയ്തെന്ന് കരുതുന്ന സന്ദേശങ്ങൾ വരെ മെറ്റ വായിക്കുകയും ചോര്‍ത്തുകയും ചെയ്യുന്നുവെന്നാണ് ഹർജിയിൽ ആരോപിക്കുന്നത്. അതേസമയം ഈ അവകാശവാദങ്ങളെ പിന്തുണയ്ക്കുന്നതിനുള്ള സാങ്കേതിക തെളിവുകൾ ഹർജിയിൽ ഉൾപ്പെടുത്തിയിട്ടില്ലെന്നാണ് റിപ്പോര്‍ട്ടുകള്‍.

അതേസമയം വാട്സ്ആപ്പിനെതിരെയുള്ള പരാതി ഉപയോഗപ്പെടുത്തുകയാണ് ഇലോണ്‍ മസ്ക്. വാട്സ്ആപ്പ് സുരക്ഷിതമല്ലെന്ന് ഇലോൺ മസ്ക് അഭിപ്രായപ്പെട്ടു. അദ്ദേഹം നേരത്തെയും ഇക്കാര്യം വ്യക്തമാക്കുന്നുണ്ട്. വാട്സ്ആപ്പിലെ സിഗ്നൽ പോലും സംശയാസ്പദമാണെന്ന് കൂട്ടിച്ചേർത്ത അദ്ദേഹം, ഉപയോക്താക്കളോട് എക്സ് ചാറ്റ് (X Chat) ഉപയോഗിക്കാൻ അഭ്യർത്ഥിക്കുകയും ചെയ്തു.

എൻഡ്-ടു-എൻഡ് എൻക്രിപ്ഷൻ, അഡ്വാൻസ്ഡ് മെസേജ് കൺട്രോളുകൾ, ലെഗസി ഡിഎമ്മുകൾ പുതിയ ചാറ്റ് ഫംഗ്ഷനുമായി സംയോജിപ്പിക്കുന്ന ഒരു ഏകീകൃത ഇൻബോക്‌സ് എന്നിവയുൾപ്പെടെ ഉപയോക്തൃ അനുഭവം മെച്ചപ്പെടുത്തുന്നതിനായി രൂപകൽപ്പന ചെയ്‌തിരിക്കുന്ന സവിശേഷതകൾ ഈ പുതിയ മെസേജിംഗ് സേവനം കൊണ്ടുവരുന്നു.