സ്വർണവിലയിൽ വീണ്ടും കുതിപ്പ്; 48 മണിക്കൂറിൽ പവന് കൂടിയത് 4,200 രൂപ

തിരുവനന്തപുരം: സംസ്ഥാനത്ത് സ്വർണവിലയിൽ വീണ്ടും റെക്കോർഡ് മുന്നേറ്റം. ഇന്നലെയുണ്ടായ വൻ വർധനവിന് പിന്നാലെ ഇന്നും വില കുത്തനെ ഉയർന്നതോടെ ഒരു പവൻ സ്വർണത്തിന്റെ വില 1.10 ലക്ഷം രൂപയ്ക്ക് തൊട്ടരികിലെത്തി. ഇന്ന് ഗ്രാമിന് 265 രൂപയും പവന് 2,120 രൂപയുമാണ് വർധിച്ചത്. ഇതോടെ ഒരു പവൻ സ്വർണത്തിന്റെ വില 1,09,800 രൂപയായി.

ഈ മാസത്തിലെ ഏറ്റവും ഉയർന്ന നിരക്കാണ് ഇന്ന് രേഖപ്പെടുത്തിയത്. ഇന്നലെ ഒരു പവൻ സ്വർണത്തിന് 1,06,880 രൂപയായിരുന്നു വില. കഴിഞ്ഞ 48 മണിക്കൂറിനിടെ മാത്രം പവന് ഏകദേശം 4,200 രൂപയുടെ വർധനവാണ് ഉണ്ടായിരിക്കുന്നത്. തുടർച്ചയായ ഈ വിലക്കയറ്റം സ്വർണവിപണിയിലും ഉപഭോക്താക്കളിലും ആശങ്ക സൃഷ്ടിക്കുകയാണ്.

അന്താരാഷ്ട്ര വിപണിയിലെ സ്വർണവിലയിലെ വർധനയും ഡോളറിലെ ചാഞ്ചാട്ടവുമാണ് ആഭ്യന്തര വിപണിയിലും വില ഉയരാൻ പ്രധാന കാരണം. ആഗോളതലത്തിൽ സ്വർണത്തിനുള്ള ആവശ്യകത വർധിച്ചതും കേന്ദ്ര ബാങ്കുകൾ വൻതോതിൽ സ്വർണം ശേഖരിക്കുന്നതും വിലയെ സ്വാധീനിക്കുന്ന ഘടകങ്ങളാണ്.

അതേസമയം, ഡോളറിനെതിരെ രൂപയുടെ മൂല്യം ഇടിഞ്ഞതോടെ സ്വർണ ഇറക്കുമതിച്ചെലവും ഉയർന്നു. ഇതിന്റെ പ്രതിഫലനമാണ് ഇന്ത്യയിലെയും കേരളത്തിലെയും സ്വർണവിലയിൽ പ്രകടമാകുന്നത്.

വിവാഹസീസൺ അടുത്തിരിക്കെ സ്വർണവിലയിലെ ഈ കുതിപ്പ് ആഭരണങ്ങൾ വാങ്ങാൻ പദ്ധതിയിടുന്നവർക്ക് വലിയ സാമ്പത്തിക ബാധ്യതയാകും. വില ഇനിയും ഉയരുമെന്ന ആശങ്കയിൽ ചിലർ ഇപ്പോൾ തന്നെ വാങ്ങാൻ ഒരുങ്ങുമ്പോൾ, വിലയിൽ കുറവ് പ്രതീക്ഷിച്ച് കാത്തിരിക്കുന്നവരും വിപണിയിലുണ്ട്