*സൂറിച്ച്:* മൂന്ന് ആതിഥേയ രാജ്യങ്ങളിലായി അരങ്ങേറുന്ന വിപുലമായ മൂന്ന് ഉദ്ഘാടന ചടങ്ങുകളോടെ 2026 ഫിഫ ലോകകപ്പിന് ആവേശകരമായ തുടക്കമാകും. മെക്സിക്കോ, അമേരിക്ക, കാനഡ എന്നീ രാജ്യങ്ങളിൽ ലോകോത്തര സംഗീത പ്രതിഭകൾ അണിനിരക്കുന്ന പരിപാടികൾ നടക്കുമെന്ന് ഫിഫ ഔദ്യോഗികമായി സ്ഥിരീകരിച്ചു.
കെയ്റ്റി പെറി, ഫ്യൂച്ചർ, അലാനിസ് മോറിസെറ്റ്, മൈക്കൽ ബബിൾ, ജെ ബാൽവിൻ, ലിസ തുടങ്ങിയ വമ്പൻ താരനിരയാണ് ഈ ഫുട്ബോൾ മാമാങ്കത്തിന് മാറ്റുകൂട്ടാൻ എത്തുന്നത്.
ജൂൺ 11-ന് മെക്സിക്കോ സിറ്റിയിലെ അസ്റ്റെക്ക സ്റ്റേഡിയത്തിൽ മെക്സിക്കോയും ദക്ഷിണാഫ്രിക്കയും തമ്മിലുള്ള ഉദ്ഘാടന മത്സരത്തിന് 90 മിനിറ്റ് മുമ്പ് ആദ്യ ആഘോഷങ്ങൾ ആരംഭിക്കും.
കൊളംബിയൻ മെഗാസ്റ്റാർ ജെ ബാൽവിൻ, മെക്സിക്കൻ റോക്ക് ബാൻഡ് മന, അലജാൻഡ്രോ ഫെർണാണ്ടസ് എന്നിവർ മെക്സിക്കോയിലെ ചടങ്ങുകളിൽ പ്രധാന ആകർഷണമാകും. ലാറ്റിൻ പോപ്പ് രാജകുമാരി ബെലിൻഡ, ദക്ഷിണാഫ്രിക്കൻ ഗായിക ടൈല എന്നിവരും മെക്സിക്കൻ തനിമ വിളിച്ചോതുന്ന ഈ പരിപാടിയിൽ അണിനിരക്കും.
ജൂൺ 12-ന് ടൊറന്റോയിൽ കാനഡയും ബോസ്നിയ ഹെർസെഗോവിനയും തമ്മിലുള്ള മത്സരത്തോടനുബന്ധിച്ചാണ് രണ്ടാമത്തെ ഉദ്ഘാടന ചടങ്ങ്. കാനഡയുടെ സാംസ്കാരിക വൈവിധ്യം പ്രതിഫലിപ്പിക്കുന്ന ഈ ചടങ്ങിൽ അലാനിസ് മോറിസെറ്റ്, മൈക്കൽ ബബിൾ, അലസ്സിയ കാര, നോറ ഫത്തേഹി എന്നിവർ പ്രകടനം നടത്തും.
കാനഡയുടെ തീരപ്രദേശങ്ങളിൽ നിന്നുള്ള കലാകാരന്മാരെ ഉൾപ്പെടുത്തി രാജ്യം കടന്നുപോകുന്ന സുപ്രധാന നിമിഷങ്ങളെ കോർത്തിണക്കിയാകും പരിപാടി അവതരിപ്പിക്കുക.
അതേദിവസം തന്നെ ലോസ് ഏഞ്ചൽസിൽ അമേരിക്കയും പരാഗ്വേയും തമ്മിലുള്ള മത്സരത്തിന് മുന്നോടിയായി മൂന്നാമത്തെ ഉദ്ഘാടന ചടങ്ങ് നടക്കും. പോപ്പ് താരം കെയ്റ്റി പെറി, റാപ്പർ ഫ്യൂച്ചർ, ബ്ലാക്പിങ്ക് താരം ലിസ, ബ്രസീലിയൻ താരം അനിത എന്നിവർ ലോസ് ഏഞ്ചൽസിലെ വേദിയിൽ ആവേശം വിതറും.
അമേരിക്കയുടെ സാംസ്കാരിക വൈവിധ്യവും ആഗോള സംഗീതത്തിലുള്ള സ്വാധീനവും വിളിച്ചോതുന്ന രീതിയിലാണ് ഈ ചടങ്ങ് ആസൂത്രണം ചെയ്തിരിക്കുന്നതെന്ന് ഫിഫ പ്രസിഡന്റ് ജിയാനി ഇൻഫാന്റിനോ പറഞ്ഞു.
ആറ് ആഴ്ച നീണ്ടുനിൽക്കുന്ന ഈ ആഗോള കായിക മാമാങ്കത്തിൽ ആരാധകർക്കും സജീവമായ പങ്കാളിത്തമുണ്ടാകുമെന്ന് സംഘാടകർ അറിയിച്ചു.
സംഗീതത്തെയും ഫുട്ബോളിനെയും ഒരേ ചരടിൽ കോർത്തിണക്കുന്ന ഈ ആഘോഷങ്ങൾ ലോകകപ്പിന്റെ ചരിത്രത്തിലെ തന്നെ ഏറ്റവും വലിയ ചടങ്ങുകളായിരിക്കുമെന്നാണ് വിലയിരുത്തപ്പെടുന്നത്. കൂടുതൽ കലാകാരന്മാരുടെ പേരുകൾ വരും ദിവസങ്ങളിൽ ഫിഫ പുറത്തുവിടും.
0 Comments