മലപ്പുറം പുളിക്കലിൽ ജ്വല്ലറിയിൽ നിന്നും രണ്ട് പവൻ സ്വർണാഭരണം എടുത്തോടിയ കേസിൽ മൂന്ന് പേർ അറസ്റ്റിൽ. കോഴിക്കോട് പെരുമണ്ണ സ്വദേശി മുഹമ്മദ് സിനാൻ (21), പൂവാട്ടുപറമ്പ് സ്വദേശി മുഹമ്മദ് ഇഖ്ബാൽ (19) എന്നിവരും പ്രായപൂർത്തിയാകാത്ത ഹയർസെക്കൻഡറി വിദ്യാർത്ഥിയുമാണ് പിടിയിലായത്. പുളിക്കലിലെ കനക മഹൽ ജ്വല്ലറിയിലാണ് മോഷണം നടന്നത്. പുളിക്കലിലെ കവർച്ചയ്ക്ക് ശേഷം കോഴിക്കോട് പന്തീരാങ്കാവ് ഉള്ള ജ്വല്ലറിയിലും ഇവർ മോഷണം നടത്തിയതായി പൊലീസ് പറയുന്നു.
സ്വർണാഭരണം വാങ്ങാൻ എത്തിയ യുവാവ് ആഭരണം എടുത്ത് ഓടുകയായിരുന്നു. മൂന്ന് പേരടങ്ങിയ സംഘമാണ് മോഷണത്തിനായി ഇറങ്ങിയത്. സ്വർണാഭരണം എടുത്തുക്കൊണ്ട് വരുന്ന യുവാവിനെ കാത്ത് രണ്ട് പേർ ബൈക്കിൽ കാത്ത് നിൽക്കുകയായിരുന്നു. ഇങ്ങനെയാണ് പ്രതികൾ രക്ഷപ്പെട്ടത്. ആസൂത്രിതമായ മോഷണം ആണെന്നാണ് പൊലീസ് പറയുന്നത്. സമാനമായ രീതിയിലാണ് ഇവർ കോഴിക്കോടും മോഷണം നടത്തിയത്.
0 Comments