മലപ്പുറത്ത് പ്ലസ് വൺ സീറ്റ് പ്രതിസന്ധി രൂക്ഷം; അപേക്ഷകർ 82,000 കടന്നു, സീറ്റുകൾ 77,000 മാത്രം

മലപ്പുറം: സംസ്ഥാനത്തെ പ്ലസ് വൺ പ്രവേശന നടപടികൾ പുരോഗമിക്കുമ്പോൾ മലപ്പുറം ജില്ലയിൽ അപേക്ഷകരുടെ എണ്ണം വീണ്ടും റെക്കോർഡ് തലത്തിലെത്തി. ഏറ്റവും പുതിയ കണക്കുകൾ പ്രകാരം 82,678 വിദ്യാർത്ഥികളാണ് ജില്ലയിൽ പ്ലസ് വൺ പ്രവേശനത്തിനായി അപേക്ഷ സമർപ്പിച്ചിരിക്കുന്നത്.

വിദ്യാർത്ഥി ബാഹുല്യം കൂടുതലുള്ള ജില്ലയായ മലപ്പുറത്ത് ഇത്തവണയും സീറ്റ് ക്ഷാമം വലിയ വെല്ലുവിളിയാകുമെന്നാണ് വിദ്യാഭ്യാസ രംഗത്തെ വിലയിരുത്തൽ. സംസ്ഥാനത്തെ ചില ജില്ലകളിലെ മൊത്തം അപേക്ഷകളെക്കാൾ കൂടുതലാണ് മലപ്പുറത്ത് മാത്രം ലഭിച്ച അപേക്ഷകളെന്നത് ശ്രദ്ധേയമാണ്.

ജില്ലയിൽ സർക്കാർ, എയ്ഡഡ് ഹയർ സെക്കൻഡറി സ്കൂളുകളിലായി 66,579 സീറ്റുകളാണുള്ളത്. അൺഎയ്ഡഡ്മേഖലയുൾപ്പെടെപരിഗണിച്ചാലും ആകെ സീറ്റുകളുടെ എണ്ണം 77,865 മാത്രമാണ്. ഇത് നിലവിലെ അപേക്ഷകരുടെ എണ്ണവുമായി താരതമ്യം ചെയ്യുമ്പോൾ ഏകദേശം 5,000 സീറ്റുകളുടെ കുറവ് നിലനിൽക്കുന്നു.

മറ്റു ജില്ലകളിൽ നിന്നുള്ള ആയിരക്കണക്കിന് വിദ്യാർത്ഥികളും മലപ്പുറത്തെ സ്കൂളുകളിലേക്ക് അപേക്ഷ നൽകിയിട്ടുണ്ട്. അപേക്ഷകരിൽ ഭൂരിഭാഗവും എസ്.എസ്.എൽ.സി വിജയികളാണ്. സി.ബി.എസ്.ഇ, ഐ.സി.എസ്.ഇ, മറ്റ് ബോർഡുകളിൽ നിന്നുള്ള വിദ്യാർത്ഥികളുടെയും അപേക്ഷകൾ ഇത്തവണ വർധിച്ചിട്ടുണ്ട്.

അപേക്ഷകളുടെ എണ്ണം ഇനിയും ഉയരാനിടയുള്ളതിനാൽ ആദ്യ അലോട്ട്മെന്റിൽ തന്നെ എല്ലാ വിദ്യാർത്ഥികൾക്കും സീറ്റ് ലഭിക്കുമോയെന്ന ആശങ്ക ശക്തമാണ്. ഉയർന്ന മാർക്ക് നേടിയ വിദ്യാർത്ഥികൾക്കും ഇഷ്ടപ്പെട്ട സ്കൂളുകളിലും കോഴ്സുകളിലും പ്രവേശനം ലഭിക്കാൻ കടുത്ത മത്സരം നേരിടേണ്ടിവരുമെന്നാണ് സൂചന.