പാമ്പ് കടിയേറ്റാൽ സ്വയംചികിത്സ അരുത്; സമയം വിലപ്പെട്ടത്; മലപ്പുറം ജില്ലയിൽ പാമ്പ് വിഷത്തിന് ചികിത്സ ലഭ്യമാകുന്ന കേന്ദ്രങ്ങളെക്കുറിച്ചറിയാം..!

*മലപ്പുറം ജില്ലയിൽ പാമ്പുകളുടെ ശല്യം വർദ്ധിച്ചുവരുന്ന സാഹചര്യത്തിൽ, പാമ്പ് കടിയേറ്റാൽ അടിയന്തരമായി വിഷഹാരി (ആന്റിവെനം) ചികിത്സ ലഭ്യമാകുന്ന ജില്ലയിലെ പ്രധാന ആശുപത്രികളുടെ പട്ടിക അറിഞ്ഞിരിക്കേണ്ടത് അത്യാവശ്യമാണ്. പാമ്പ് കടിയേറ്റാൽ ആദ്യത്തെ ഒരു മണിക്കൂർ (ഗോൾഡൻ അവർ) അതീവ നിർണായകമാണെന്നിരിക്കെ, കൃത്യമായ സമയത്ത് ചികിത്സ ലഭ്യമാക്കണം.*

*​മലപ്പുറം ജില്ലയിൽ സർക്കാർ മേഖലയിലും സ്വകാര്യ മേഖലയിലുമായി നിരവധി ആശുപത്രികളിൽ പാമ്പ് വിഷത്തിനെതിരെയുള്ള അത്യാധുനിക ചികിത്സാ സൗകര്യങ്ങൾ ലഭ്യമാണ്.*

♦️ *പ്രധാന കേന്ദ്രങ്ങൾ ഇവയാണ്:*

➖➖➖➖➖➖➖➖➖

*മഞ്ചേരി സർക്കാർ മെഡിക്കൽ കോളേജ് ആശുപത്രി, തിരൂർ ജില്ലാ ആശുപത്രി, പെരിന്തൽമണ്ണ ജില്ലാ ആശുപത്രി എന്നിവയാണ് സൗജന്യമായി മികച്ച ചികിത്സ നൽകുന്ന പ്രധാന സർക്കാർ കേന്ദ്രങ്ങൾ.*

*സ്വകാര്യ മേഖലയിൽ പെരിന്തൽമണ്ണയിലെ ഇ.എം.എസ് സഹകരണ ആശുപത്രി, കിംസ് അൽ ഷിഫ ആശുപത്രി, മൗലാന ആശുപത്രി എന്നിവടങ്ങളിലും കോട്ടക്കൽ അൽമാസ് ആശുപത്രി, കോടക്കൽ മിഷൻ ആശുപത്രി എന്നിവിടങ്ങളിലും ഇരുപത്തിനാല് മണിക്കൂറും പരിചയസമ്പന്നരായ ഡോക്ടർമാരുടെ സേവനവും ആന്റിവെനവും ലഭ്യമാണ്.*

*​പാമ്പ് കടിയേറ്റാൽ യാതൊരു കാരണവശാലും മന്ത്രവാദമോ മറ്റ് പരമ്പരാഗതമായ സ്വയംചികിത്സകളോ നടത്തി സമയം കളയരുതെന്ന് ആരോഗ്യവകുപ്പ് കർശന മുന്നറിയിപ്പ് നൽകുന്നു. കടിയേറ്റ വ്യക്തിയെ ഭയപ്പെടുത്താതെ ശാന്തനാക്കി ഇരുത്തുകയും, മുറിവേറ്റ ഭാഗം അനക്കാതെ സൂക്ഷിക്കുകയും വേണം. മുറിവിന് മുകളിൽ ശക്തമായി കെട്ടിയിടുന്നത് രക്തയോട്ടം തടസ്സപ്പെടാൻ കാരണമാകുമെന്നതിനാൽ അത് ഒഴിവാക്കണം.*

*കേരളത്തിൽ സാധാരണയായി കാണപ്പെടുന്ന മൂർഖൻ, വെള്ളിക്കെട്ടൻ (ശംഖുവരയൻ), അണലി തുടങ്ങിയ പ്രധാന വിഷപ്പാമ്പുകളുടെ കടിയേറ്റാൽ നൽകാനുള്ള ആന്റിവെനം ഈ ആശുപത്രികളിൽ ലഭ്യമാണ്. എന്നാൽ 'മുഴമൂക്കൻ കുഴിമണ്ഡലി' പോലുള്ള ചില പ്രത്യേക ഇനം പാമ്പുകളുടെ വിഷത്തിന് നിലവിലെ ആന്റിവെനം ഫലപ്രദമല്ലാത്തതിനാൽ, അത്തരം സാഹചര്യങ്ങളിൽ ഡയാലിസിസ് ഉൾപ്പെടെയുള്ള പ്രത്യേക തീവ്രപരിചരണ സംവിധാനങ്ങളുള്ള മഞ്ചേരി മെഡിക്കൽ കോളേജ് പോലുള്ള വലിയ ആശുപത്രികളെ എത്രയും വേഗം സമീപിക്കണമെന്ന് ഡോക്ടർമാർ.*