ആർക്കും കൊട്ടാവുന്ന ചെണ്ടയല്ല ഞങ്ങൾ, പൊലീസ് ഉദ്യോഗസ്ഥരോടുള്ള പേക്കൂത്ത് ഖേദകരം’; പൊലീസ് അസോസിയേഷൻ

തിരുവനന്തപുരം: നഗരൂർ എസ്‌എച്ച്ഒയെ ആക്രമിക്കാൻ ശ്രമിച്ച സംഭവത്തിൽ വിമർശനവുമായി പൊലീസ് അസോസിയേഷൻ. കോൺഗ്രസിന്റെ ഫ്ലെക്സ് ബോർഡുകൾ നശിപ്പിച്ച കേസിൽ നോട്ടിസ് നൽകിയതിൽ പ്രകോപിതരായാണ് സിപിഎം–ഡിവൈഎഫ്ഐ പ്രവർത്തകർ നഗരൂർ എസ്‌എച്ച്ഒ എൻ. അൻസാറിനെ ആക്രമിക്കാൻ ശ്രമിക്കുകയായിരുന്നു. ആർക്കും കൊട്ടാവുന്ന ചെണ്ടയല്ല പൊലീസെന്ന് അസോസിയേഷൻ വ്യക്തമാക്കി.

പൊലീസ് ഉദ്യോഗസ്ഥരോടുള്ള പേക്കൂത്ത് ഖേദകരമാണെന്നും അസോസിയേഷൻ ഫേസ്ബുക്ക് പോസ്റ്റിൽ പറഞ്ഞു. ആക്രമണത്തിൽ ഡി.ജി.പി ശക്തമായ നടപടി സ്വീകരിക്കണമെന്ന് അസോസിയേഷൻ ആവശ്യപ്പെട്ടു. കണ്ണൂരിൽ കഴിഞ്ഞ ദിവസം വീണാ ജോർജിനെ കെ.എസ്.യു പ്രവർത്തകർ ആക്രമിച്ച സംഭവത്തിൽ വെള്ളല്ലൂരിൽ സി.പി.എം, ഡി.വൈ.എഫ്.വൈ പ്രവർത്തകർ പ്രതിഷേധം നടത്തിയിരുന്നു.

കോൺഗ്രസിന്‍റെ ഫ്ലക്സ് ബോർഡുകൾ കീറുകയും മണ്ഡലം പ്രസിഡന്‍റ് വി.ആർ അനന്ദു കൃഷ്ണനെ കൈയ്യേറ്റം ചെയ്തെന്നും പരാതിയുണ്ട്. ഇതിൽ സ്റ്റേഷനിൽ ഹാജരാകാൻ നോട്ടീസ് നൽകാൻ വീട്ടിലെത്തിയ എസ്.എച്ച്. ഒ അന്‍സാർ ഉൾപ്പെടെയുള്ളവരെ ഡി.വൈ.എഫ്.വൈ പ്രവർത്തകർ കാർ ജീപ്പിന് കുറുകെയിട്ട് സംഘം തെറി വിളിക്കുകയായിരുന്നു.

ഇതിനു പിന്നാലെയാണ് സിപിഎം, ഡിവൈഎഫ്ഐ പ്രവർത്തകർ എസ്എച്ച്ഒയുടെ ജീപ്പ് തടഞ്ഞത്. നോട്ടിസ് നൽകാൻ എത്തിയ പൊലീസുകാരൻ മോശമായി പെരുമാറിയെന്നാണ് പ്രവർത്തകരുടെ ആരോപണം.