സ്കൂൾ വിദ്യാർഥികളെ ലക്ഷ്യം വെച്ച് ലഹരി കച്ചവടം, നടക്കാവിലെ ലോഡ്ജിലുണ്ടെന്ന് വിവരം; 26 ​​ഗ്രാം എംഡിഎംഎയുമായി പിടിയിലായത് നാലംഗ സംഘം

കോഴിക്കോട്: 26 ഗ്രാം എംഡിഎംഎയുമായ നാലംഗ സംഘം പിടിയിൽ. കോഴിക്കോട് നഗരത്തിൽ ഡാൻസാഫിന്റെ പരിശോധനയിലാണ് ലഹരി വിൽപ്പന നടത്തി വന്നിരുന്ന യുവാക്കൾ കുടുങ്ങിയത്. സ്കൂൾ വിദ്യാർഥികളെ ലക്ഷ്യമാക്കി ലഹരി വിതരണം നടത്തുന്ന സംഘത്തിലെ കണ്ണികളാണ് പിടിയിലായത്. ഇവരെ നടക്കാവിലെ സ്വകാര്യ ലോഡ്ജിൽ നിന്നുമാണ് ഉദ്യോഗസ്ഥർ പിടികൂടിയത്. കോഴിക്കോട് ബട്ട്റോഡ് സ്വദേശി റോബർട്ട് ജയിംസ്, കല്ലായി സ്വദേശി ശഹറീസ്, നടുവണ്ണൂർ സ്വദേശി മുഹമ്മദ് റിസ്‌വാൻ, പയ്യാനക്കൽ സ്വദേശി ഫിനാൻ നാസിം എന്നിവരാണ് അറസ്റ്റിലായത്. ഇവരിൽ റോബർട്ട് ജയിംസ് മുൻപ് ലഹരി കേസിൽ കുറ്റക്കാരനെന്ന് കണ്ടെത്തി. ആറ് വർഷം ഇയാൾ ജയിൽ ശിക്ഷ അനുഭവിച്ചിട്ടുണ്ട്. പ്രതികളെല്ലാവരുടെയും പേരിൽ വിധ സ്റ്റേഷനുകളിൽ മയക്കുമരുന്ന് ഉപയോഗിച്ചതിനും വിൽപ്പന നടത്തിയതിനും കേസുണ്ടെന്നാണ് പോലീസ് പറയുന്നത്.